លោក យឹម សុវណ្ណ បានបញ្ជាក់ថា “លិខិតរបស់ព្រះមហាក្សត្រ បានបង្ហាញហើយថា ឯកឧត្តមប្រធាន សម រង្ស៊ី មិនមានទោសទេ ហើយថ្ងៃនេះ ( ១២ កក្កដា ) ព្រះមហាក្សត្រ បានឡាយព្រះហត្ថលេខាលើកលែងទោស។ នេះលិខិត គឺបញ្ជាក់ថា ឯកឧត្តមប្រធាន មិនមានទោសអ្វីទាល់តែសោះ”។
សូមរម្លឹកថា លោក សម រង្ស៊ី ត្រូវបានតុលាការផ្តន្ទាទោសឲ្យជាប់ពន្ធនាគារជាង ១០ឆ្នាំ នៅក្នុងសំណុំរឿងដកតម្រុយបង្គោលព្រំដែនកម្ពុជា-វៀតណាម ការក្លែងឯកសារសាធារណៈលើផែនទី ការផ្សាយព័ត៌មានមិនពិត និងបរិហាកេរ្តិ៍លោកឧបនាយករដ្ឋមន្ត្រី ហោ ណាំហុង រដ្ឋមន្ត្រីការបរទេស។
សូមរម្លឹកថា សម្តេចនាយករដ្ឋមន្ត្រី ហ៊ុន សែន បានក្រាបបង្គំទូលថ្វាយព្រះមហាក្សត្រ នូវសារលិខិតមួយច្បាប់ ដើម្បីទូលស្នើព្រះករុណា ព្រះរាជទានទោសដល់លោក សម រង្ស៊ី។
ក្នុងលិខិត ដែលធ្វើឡើងចំថ្ងៃឪពុករបស់សម្តេច ហ៊ុន សែន គឺលោកឧកញ៉ា មហាភក្តី ហ៊ុន នាង ទទួលមរណភាព នៅវេលាទៀបភ្លឺ ថ្ងៃទី១២កក្កដានេះ សម្តេចនាយករដ្ឋមន្ត្រី ហ៊ុន សែន បានទូលថ្វាយព្រះករុណាថា “ដោយយោងលើស្មារតីបង្រួបបង្រួមជាតិ ការផ្សះផ្សារជាតិ និងដើម្បីឲ្យការបោះឆ្នោតជ្រើសរើសតំណាងរាស្ត្រ នីតិកាលទី៥ នេះ ប្រព្រឹត្តទៅតាមគោលការណ៍លទ្ធិប្រជាធិបតេយ្យ សេរីពហុបក្ស ដោយមានគ្រប់ភាគីពាក់ព័ន្ធចូលរួម និងផ្អែកតាមលិខិតស្នើសុំព្រះរាជទានលើកលែងទោសរបស់ឯកឧត្តម សម រង្ស៊ី ចុះថ្ងៃទី១៣ ខែមិថុនា ឆ្នាំ២០១៣ ទូលព្រះបង្គំជាខ្ញុំ សូមព្រះករុណា ជាអម្ចាស់ ទ្រង់ព្រះបរមរាជានុញ្ញាតដ៏ខ្ពង់ខ្ពស់លើកលែងទោស ដល់ឯកឧត្តម សម រង្ស៊ី ដែលត្រូវបានផ្តន្ទាទោស តាមសាលដីកាស្ថាពរ លេខ ៣២ ចុះថ្ងៃទី១ ខែមិនា ឆ្នាំ២០១១ របស់តុលាការកំពូល និងសាលដីកាស្ថាពរ លេខ ៨៤ ចុះថ្ងៃទី២០ ខែកញ្ញា ឆ្នាំ២០១១ របស់សាលាឧទ្ធរណ៍”។
យោងតាមសេចក្តីក្រាបបង្គំទូលថ្វាយរបស់សម្តេច ហ៊ុន សែន ព្រះករុណា ព្រះមហាក្សត្រ សម្តេចព្រះបរមនាថ នរោត្តម សីហមុនី បានឡាយព្រះហស្ថលេខា លើព្រះរាជក្រឹត្យ ចុះថ្ងៃទី១២ ខែកក្កដា ឆ្នាំ២០១៣ លើកលែងទោសដល់លោក សម រង្ស៊ី។
កាលពីឆ្នាំ២០០៦ លោក សម រង្ស៊ី ក៏ធ្លាប់ត្រូវបានព្រះករុណាព្រះមហាក្សត្រ ព្រះរាជទានការលើកលែងទោសម្តងហើយ បន្ទាប់ពីលោក ត្រូវបានតុលាការកាត់ទោស ក្នុងរឿងប្តឹងផ្តល់ជាមួយសម្តេចក្រុមព្រះ នរោត្តម រណឫទ្ធិ និងជាមួយសម្តេច ហ៊ុន សែន៕
ប្រភពពី CEN
About the Author
